L A M E N T

قلبي عميقٌ كبئر , يسهل أن تنظرَ إلى مافيه , وهلاكٌ أن تصل إلى قعره .

أومن أن خلف الحبّات الوادعات .. تزهو جنات
أومن أن خلف الليل العاتي الأمواج .. يعلو سراج
أومن أن القلب الملقى في الأحزان .. يلقى الحنان
كلي إيمان ..
أومن أن خلف الريح الهوجاء شفاه .. تتلو الصلاه
أومن أن في صمت الكون المقفلِ .. من يصغي لي
إني إذ ترنو عيناي للسماء .. تصفو الأضواء
تعلو الألحان ..

* إهداء لمن يسألني : تدوخ من القهوة ؟ وأشياء طفولية أخرى : )

(1)

ميم : منصور ترى مو كل الايرانيين متشددين تدري ؟
أنا : أكيد , مو معقولة شعب كامل يفكر بتفكير واحد . أكيد في المتشدد وفي العادي .
ميم : أنا قلتلك عن الايرانيين اللي قابلتهم بستاربكس اللي ببرايتون صح ؟
أنا : اي ستين مرة قلت لي السالفة ههههه
ميم : ياخي هذيك البنت فاااااهمة . من جد فاهمة ! هم اللي جوني تدري ؟ كان مرة زحمة ستاربكس ذاك اليوم وكنت جالس لحالي على طاولة وقالوا لي ممكن نجلس معاك ؟ قلت اي تفضلوا وجلسوا يسولفوا معي . بالانجليزي طبعاً
أنا : كويس يعني مو بالفارسي ؟
ميم : ههههه لاوالله بالانجليزي , بس مرة رهيبين   .
أنا : أنت الرهيب .
ميم : تسلم , ياليتك معي وقتها . مرة فاهمة البنت والله ! كان ودي إنك شفتها , لما سألتني إنت من وين وقلت لها سعودي قالت أنا أمنيتي أجي أزور السعودية . مدري وش لاقيين فيها هههه
أنا : مهوى الأفئدة وش عرفك هههه
ميم : هههه تسألني تقول عندكم بالسعودية بارات ونايت كلوبس وكذا قلت اي عندنا لكن توب سيكرت ( جاب العيد ) . قالت حتى عندنا زي كذا توب سيكرت عشان في متشددين كثير بإيران , قلت لها حتى عندنا في متشددين كثير . قالت حنا نسميهم شيخ , قلت حتى حنا بعد نسميهم شيخ . قالت لي أنا ما أحب المتشددين هذول , قلت حتى أنا والله ما أحبهم . قالت أنا ليبرالية وأنت ؟ قلت أيوه حتى أنا ليبرالي ههههههه
أنا : ههههههه وأنت كل شيء تقوله لك تقول أيوه وأنا بعد ؟
ميم : هههههههه ياخي فاهمة البنت ماشاءالله , تردح ردح ياشيخ هههههههه . تصدق اخوياها اثنين معاها واحد منهم كان لابس صليب , توي أدري بإيران فيه مسيحيين .
أنا : جد ؟ والله زيك توي أعرف فيها مسيحيين , بس ما أستبعد لأنه حتى يهود فيها
ميم : أي يارجال فيها كل شيء , بس أقولك ترى مو كل الايرانيين متشددين .
أنا : اي , اقتنعت بوجهة نظرك والله .
ميم : يسعد لي الانفتاح ياشيخ , حتسي !
أنا : اي بالله حتسي !

(2)

ميم : نواف * أشوف ارقص زي مايكل
نواف : انقلع
أنا : نواف عيب تقول كذا .
نواف : طيب شوفه خليه يسكت هذا طفشني
ميم : شكلك ماتعرف ترقص صح ؟
نواف : الا اعرف
ميم : طيب ورني ارقص يله
نواف : ما ابغى
ميم : شفت إنك ماتعرف ؟ شوف شوف يامنصور مايعرف يرقص كااااااااك
نواف : انقلع إنت ووجهك هذا
ميم : أحلى من وجهك , نواف ليه مافيك سنون ؟
نواف : الا فيني سنون
ميم : لا شوف كلهم متكسرين كااااااااك
نواف : شوف أنت شعرك اللي مدري كيف جاي .. من اليمين طاير ومن الجنب عادي
ميم : أحسن منك اللي مافيك شعر كااااااك
نواف : الا فيني شعر أحلى منك
ميم : نواف ليش شكلك يضحّك ؟ كاااااااك
نواف : أحسن من شكلك .
ميم : أمانة منصور ماتحس شكله يضحّك ؟ كااااااك
نواف : اسكت احسن لك !
ميم : ياحراااام شكله يضحّك . كاااااااك
أنا : خلاص الله يخليك جننته تراك .
ميم : والله ماجننته , هو اللي جنني , هستر فيني الورع هذا .
أنا : اي مبين !
ميم : ياحرام شكله يضحك كاااااك !

* نواف ولد عمي الصغير , عمره تقريباً 4 سنوات . خطير حالما يقلد رقص مايكل جاكسون P:

(3)

ميم : تدري يامنصور .. العرب ماتوا !
أنا : وش عندك يالفرنسي
ميم : هههه حلوة .. لا مافهمت قصدي الله يحييك , أقصد يعني العرب العظماء ماتوا خلاص , الحين ماعندك أحد , كل حكام العرب هذول عملاء لأمريكا ترى . والله كان بوش مربيهم , يعطيهم بالجزمة على روسهم هههههه مافيه الا محط . لكن ترى أوباما مثقف يعاملهم زين , صدقني العرب الصح أيام الرسول والخلفاء الراشدين بس , العرب بالوقت الحاضر ثق ثقة تامة إنو ماعندك أحد . والا شرايك يامنص ؟
أنا : يمكن : )
ميم : شكلك مالك نفس تسولف صح ؟
أنا : لا عادي بس أنت تخلط الأمور
ميم : لا والله ما أخلط الأمور بس ثق ثقة تامة إنه ماينفع مع العرب هذول الا بوش . والله يامنص ترى الاوربيين والأمريكان مايشوفون العرب شيء . يشوفونا زي الحشرة ! ثق ثقة تامة إن اللي عازّنا البترول والا بدونه مانسوى شيء . تدري , أنا أكره العرب أصلاً .
أنا : ليه ؟
ميم : العرب ماتوا والله يامنص .. لو أقولك شيء ماتصدقني .
أنا : ايش ؟
ميم : تدري أنا لي 12 سنة يمكن ماسمعت أغاني عربية !
أنا : أريح لك .
ميم : أحب اسمع غربي بس . أنا أنفع أكون سفير السعودية لواشنطن , والا شرايك ؟
أنا : تنفع ليه ماتنفع !
ميم : حبيب ألبي والله يامنص  . حتسي !

(4)

ميم : منصور تعرف ديفيد وايز ؟
ح : أنا أعرف ديفيد سوازو
ميم : أقول أنت خلك بالكورة بس . تعرفه منصور ؟
أنا : اي حاخام يهودي , داعية سلام .
ميم : صح  , شرايك فيه ؟
ح : أكيد بيعرف عشان دارس سياسة .
ميم : أقول أنت خلك بسوازو حقك وخل البولتيشن للكبار , لما تكبر ويصير عندك ثقافة سياسية تعال سولف معانا أوكي ياحلو ؟ Daaamn

( ح أحد أقربائنا , يعامله ميم كأنه أصغر أولاده على الرغم من أنه أكبر منا جميعاً , الحقيقة أنه يعامل الجميع كأنهم أولاد صغار لاتقتصر المسألة على ح , ربما يستثنيني أنا فقط من هذه المعاملة )

{ وَظَنَّ أَنَّهُ الفِراقُ }

 القيامة , آية 28

 الله أكبر الله أكبر الله أكبر لا إله إلا الله , الله أكبر الله أكبر ولله الحمد . الله أكبر كبيرا , والحمدلله كثيرا , وسبحان الله بكرةً وأصيلا , لا إله الا الله وحده , صدق وعده , و نصر عبده , وأعزّ جنده , وهزم الأحزاب وحده . لا إله الا الله ولا نعبد إلا إياه مخلصين له الدين ولو كره الكافرون . اللهم صلي على سيدنا محمد وعلى آله وصحبه وسلم تسليماً كثيرا .
كل عام وأنتم بألف خير جميعاً , من العايدين : )

* صور ليان بعدسة ابنة عمي : منى , شكراً جزيلاً لك يافنانة : )

اللهم إنا نحمدك ونستعينك ونستهديك , ونثني عليك الخير كله , دقِه وجلّه , فأنت أحق أن تعبد , وأنت أحق أن تحمد , إياك نعبد ولك نصلي ونسجد , وإليك نسعى ونحفد , نرجو رحمتك , ونخشى عذابك , إن عذابك الجدّ بالكفار ملحق , لك الحمد بالإيمان , ولك الحمد بالقرآن , ولك الحمد على الصيام والقيام , بسطت رزقنا , أظهرت أمننا , كبتّ عدونا , ومن كل شيءٍ سألناك ربنا أعطيتنا . فلك الحمد حتى ترضى , ولك الحمد إذا رضيت , ولك الحمد بعد الرضى , لا نحصي ثناءً عليك , أنت كما أثنيت على نفسك . . .