L A M E N T

حبك أناني بالتأكيد ,

ومفكّر إنك إنتا وحيد وعنيد !

السيد ميم يكره الخطوط ويحب الحِجز

– تعرف كودو اللي بالمطار ؟
– اي
– قبل ثلاث أيام قابلت فيه اثنين طيارين , 4 خطوط على كتوفهم .. حِجز هم , شكلهم تاريخ بالخطوط السعودية , 4 خطوط أقولك ! المهم سألتهم كيف الخطوط ؟ ناظر فيني وأشّر على خويه وقال طيار وأشرّ على نفسه وقال ملاّح .
– طيب وش الفرق بين الطيار والملاّح ؟
– مدري بس شكلهم تاريخ بالخطوط , 4 خطوط شفيك أنت ! تاريخ والله .. قلت له والله ما في زي الخطوط البريطانية , البريتش أحلى طيران صدقني . تدري وش قال ؟ قال فعلاً البريطانية ما في زيها مع إني ما عمري ركبتها .
– طيب أجل كيف عرف وهو ما عمره ركبها ؟
– يأخي أكيد يعرفون شوف كم لهم سنة بالخطوط , لهم تاريخ ! أكيد يعرفون عن الخطوط الثانية . قلتله عاد أنا ركبتها ما في زيها صدقني , بس تدري وش الميزة الوحيدة بالخطوط السعودية ؟ سألني كذا بلهجة حجازية ( ايش ) . قلت له دعاء السفر بس . ناظر فيني وقال أدعي للخطوط بالهداية , قلت أنا والله ودي أدعي بالقائمين عليها بالهداية .
بس تدري يا منص , أنا أحب الحجاز والله . ترى شباب جدة منفتحين مو زي شباب الرياض , الواحد يفكر كيف يروح الغنم , وإلا شلون يصيد ضبان ! ترى لا يغرك الجو .. تحسب جدة يعني جوها رطوبة وحرّ ؟ ترى حتى الحِجز يوم يجون الرياض يكرهون حياتهم من الحر والجفاف , حتى وجهه ينشف ويحترق من الحر . يسعدلي جدة يا شيخ .

السيد ميم فوق الجميع

ترى والله ألمانيا شيء , فرانكفورت هذي مدينة اقتصادية بحتة زي نيويورك بأمريكا . تدري أن مصنع اليورو بفرانكفورت ؟ والله ألمانيا هذه ديرة . ألمانيا فوق الجميع .. والله ألمانيا فوق الجميع يا منص . شفت كسينجر تراه ألماني أصلاً , هذا لو أنه مولود بأمريكا زمان ترى صار رئيس أمريكا .. لأنه هو مهندس السياسة الخارجية الأمريكية , لكن وزير خارجية تركيا أوغلو هو مهندس السياسة الخارجية الجديد , تقدر تعتبره خليفة كسينجر , لكن بتركيا طبعاً بدري عليه يكون مهندس السياسة الخارجية الأمريكية . شوف أنا بقولك شيء مهم .. ترى الأجانب بشكل عام مؤدبين , أطفالهم وبزارينهم مرة مؤدبين ! تقوله أسكت يسكت على طول ! تذكر توم وأمه اللي قلتلك عنهم ؟ الولد يازينه ياخي يلعب معي ويجيني وحنا جالسين بالكوفي ولما قالت له أمه توم سيت داون على طول راح وجلس ! مؤدبين والله مؤدبين يا منص , مو زي بزرايننا يارجال قرود والواحد يجيك متنح ولا يرّد ! تشوف بزاريننا تتحسف أنك عربي هاهاها والله يا منص تتحسف أنك عربي !

السيد ميم نصير المهن المنسية

شوف الحلاق هذا ! كرهت أجي عنده .. حقير ياشيخ , نفسّية ! أحس بينه وبين الابتسامة عداوة ! ما يضحك نهائياً يارجال .. وأخلاقه مرة زبالة . ويجرحك بعدين .. لما حلق لي مرة قلت له حط لي سكينول قالي مايحتاج ! تخيل ؟ والله كرهته من بعدها . مع إني أحترم الحلاقين لأنها مهنة ماهي سهلة ترى ! تدري ليش ؟ لأن هذا الكرسي يجلس عليه كل الناس , من الطفران للوزير , علوم الناس تلاقيها كلها عنده . في حلاقين على مستوى عالي والله مايحلقون الا للسوبر ستارز بهوليوود والرؤساء وهذول ! أنا مرة حلق لي واحد ايطالي بـ 25 دولار بس وش يا منص أتعب وأنا أقولك فنان !

السيد ميم يُحاضر

أمريكا هذه يحكمها رأس المال فقط . ما يحكمها لا حضارة ولا شيء . ولا يمكن تحكمها حضارة بأي شكل من الأشكال . والا شرايك يا منص ؟

السيد ميم يتسائل

على كرسي الحلاق , ينادي السيد ميم , ووجهه ممتلئ بالرغوة بأعلى صوته : منصور , منص .. تعال بالله !
– وش تبي ؟
– تحبني وإلا تحب الدراهم ؟
– أحبك أنت .
– والله مدري عنك ! هاهاها

السيد ميم يريد أن يخرج رأسه من النافذة

مررنا بجانب جمس هيئة الأمر بالمعروف والنهي عن المنكر , وكانت رغبة السيد ميم لا توصف بأن يخرج رأسه من النافذة ويصرخ بجمس الهيئة : يا طالبان ! لكن لأنه يخاف طلب منا بمجرد انتهاء النون في طالبان أن ( ندعس ) حتى لا يمسكوننا ويجلدوننا ! لكن رفضنا لأن على السيد ميم أن يكون شجاعاً ويتحمل تبعات الصرخة .

السيد ميم يتنصت

في أحد المحلات الكبيرة التفتنا فجأة على صوت صراخ وتهديد , كان السيكيورتي في المحل ممسكين بأحد المراهقين , لم نهتم لهذا الأمر لكن السيد ميم يهتّم , ذهب قريباً منهم ( عامل حالو مش عارف ) كأنه يريد الشراء وألقى أذنه عليهم ثم عاد وقال بلهجة المنتصر : يحققون معه بتهمة سرقة جزمة .

السيد ميم يشعر بالإحباط

حصلت مضاربة بين فتيات في أحد المولات بشارع التحلية . وقفنا بعيداً نشاهد هذا الحدث المثير نادر التكرار في مدينة كالرياض , فجأة فقدنا السيد ميم وأخذنا نبحث عنه ثم وجدناه يقف بجانب فتاة يمسّد شنبه . كانت تصرخ بعنف شديد , اقترب منها وقال : طيب ليه ما اتصلتي على 902 يفصلون الخدمة ؟ أجابته الفتاة بتأثر شديد : صوري فيه ورسائلي وكل شيء ! فهمنا هنا أن هاتفها قد سرقته الفتاة الأخرى . شعرنا بالإحراج الشديد وكلنا يقول للآخر ليأتي أحدكم به ! ثم أتى به أخيه يجره جرّاً . انتظرنا أقل من دقيقة وإذ بالسيد ميم يعود إلى جانب الفتاة ممسكاً شنبه ويقول : لو أنا منك اتصلت على 902 يفصلون الخدمة . حصل هرج ومرج شديد وفجأة بعد أن تجمّع الناس وجاءت الشرطة , جاء شاب وأمسك يد الفتاة الأخرى وقطع بها ركضاً شارع التحلية المزدحم . كنا ننظر لهذا الموقف الغريب ونضحك باستثناء السيد ميم الذي كان حزيناً ولم يستوعب أن الفتاة لم تتصل على 902 لتلغي الخدمة بعد أن سُرق هاتفها .

السيد ميم متعاطفاً

– منصور تعرف كيف صارت الكويت أيام غزو الطاغية العراقي الديكتاتور صدام حسين ؟
– كيف صارت ؟
– صارت حيص بيص .
– صحيح
– تدري أن يوم إعدام الطاغية الكويتيين عيّدوا عيدين والله . تدري ليش يا منصور ؟
– ليش ؟
– لأنهم عانوا والله من غزو هذا الطاغية , عيّشهم بحيص بيص يا رجال !

يا مَن لا يَعلَمُ كيفَ هُوَ إلاَّ هُوَ , ويا مَن لا يَبْلُغُ قُدرَته غيرُه , فَرِّجْ عَنِّي .