(1)
ميم : منصور ترى مو كل الايرانيين متشددين تدري ؟
أنا : أكيد , مو معقولة شعب كامل يفكر بتفكير واحد . أكيد في المتشدد وفي العادي .
ميم : أنا قلتلك عن الايرانيين اللي قابلتهم بستاربكس اللي ببرايتون صح ؟
أنا : اي ستين مرة قلت لي السالفة ههههه
ميم : ياخي هذيك البنت فاااااهمة . من جد فاهمة ! هم اللي جوني تدري ؟ كان مرة زحمة ستاربكس ذاك اليوم وكنت جالس لحالي على طاولة وقالوا لي ممكن نجلس معاك ؟ قلت اي تفضلوا وجلسوا يسولفوا معي . بالانجليزي طبعاً
أنا : كويس يعني مو بالفارسي ؟
ميم : ههههه لاوالله بالانجليزي , بس مرة رهيبين .
أنا : أنت الرهيب .
ميم : تسلم , ياليتك معي وقتها . مرة فاهمة البنت والله ! كان ودي إنك شفتها , لما سألتني إنت من وين وقلت لها سعودي قالت أنا أمنيتي أجي أزور السعودية . مدري وش لاقيين فيها هههه
أنا : مهوى الأفئدة وش عرفك هههه
ميم : هههه تسألني تقول عندكم بالسعودية بارات ونايت كلوبس وكذا قلت اي عندنا لكن توب سيكرت ( جاب العيد ) . قالت حتى عندنا زي كذا توب سيكرت عشان في متشددين كثير بإيران , قلت لها حتى عندنا في متشددين كثير . قالت حنا نسميهم شيخ , قلت حتى حنا بعد نسميهم شيخ . قالت لي أنا ما أحب المتشددين هذول , قلت حتى أنا والله ما أحبهم . قالت أنا ليبرالية وأنت ؟ قلت أيوه حتى أنا ليبرالي ههههههه
أنا : ههههههه وأنت كل شيء تقوله لك تقول أيوه وأنا بعد ؟
ميم : هههههههه ياخي فاهمة البنت ماشاءالله , تردح ردح ياشيخ هههههههه . تصدق اخوياها اثنين معاها واحد منهم كان لابس صليب , توي أدري بإيران فيه مسيحيين .
أنا : جد ؟ والله زيك توي أعرف فيها مسيحيين , بس ما أستبعد لأنه حتى يهود فيها
ميم : أي يارجال فيها كل شيء , بس أقولك ترى مو كل الايرانيين متشددين .
أنا : اي , اقتنعت بوجهة نظرك والله .
ميم : يسعد لي الانفتاح ياشيخ , حتسي !
أنا : اي بالله حتسي !
(2)
ميم : نواف * أشوف ارقص زي مايكل
نواف : انقلع
أنا : نواف عيب تقول كذا .
نواف : طيب شوفه خليه يسكت هذا طفشني
ميم : شكلك ماتعرف ترقص صح ؟
نواف : الا اعرف
ميم : طيب ورني ارقص يله
نواف : ما ابغى
ميم : شفت إنك ماتعرف ؟ شوف شوف يامنصور مايعرف يرقص كااااااااك
نواف : انقلع إنت ووجهك هذا
ميم : أحلى من وجهك , نواف ليه مافيك سنون ؟
نواف : الا فيني سنون
ميم : لا شوف كلهم متكسرين كااااااااك
نواف : شوف أنت شعرك اللي مدري كيف جاي .. من اليمين طاير ومن الجنب عادي
ميم : أحسن منك اللي مافيك شعر كااااااك
نواف : الا فيني شعر أحلى منك
ميم : نواف ليش شكلك يضحّك ؟ كاااااااك
نواف : أحسن من شكلك .
ميم : أمانة منصور ماتحس شكله يضحّك ؟ كااااااك
نواف : اسكت احسن لك !
ميم : ياحراااام شكله يضحّك . كاااااااك
أنا : خلاص الله يخليك جننته تراك .
ميم : والله ماجننته , هو اللي جنني , هستر فيني الورع هذا .
أنا : اي مبين !
ميم : ياحرام شكله يضحك كاااااك !
* نواف ولد عمي الصغير , عمره تقريباً 4 سنوات . خطير حالما يقلد رقص مايكل جاكسون P:
(3)
ميم : تدري يامنصور .. العرب ماتوا !
أنا : وش عندك يالفرنسي
ميم : هههه حلوة .. لا مافهمت قصدي الله يحييك , أقصد يعني العرب العظماء ماتوا خلاص , الحين ماعندك أحد , كل حكام العرب هذول عملاء لأمريكا ترى . والله كان بوش مربيهم , يعطيهم بالجزمة على روسهم هههههه مافيه الا محط . لكن ترى أوباما مثقف يعاملهم زين , صدقني العرب الصح أيام الرسول والخلفاء الراشدين بس , العرب بالوقت الحاضر ثق ثقة تامة إنو ماعندك أحد . والا شرايك يامنص ؟
أنا : يمكن : )
ميم : شكلك مالك نفس تسولف صح ؟
أنا : لا عادي بس أنت تخلط الأمور
ميم : لا والله ما أخلط الأمور بس ثق ثقة تامة إنه ماينفع مع العرب هذول الا بوش . والله يامنص ترى الاوربيين والأمريكان مايشوفون العرب شيء . يشوفونا زي الحشرة ! ثق ثقة تامة إن اللي عازّنا البترول والا بدونه مانسوى شيء . تدري , أنا أكره العرب أصلاً .
أنا : ليه ؟
ميم : العرب ماتوا والله يامنص .. لو أقولك شيء ماتصدقني .
أنا : ايش ؟
ميم : تدري أنا لي 12 سنة يمكن ماسمعت أغاني عربية !
أنا : أريح لك .
ميم : أحب اسمع غربي بس . أنا أنفع أكون سفير السعودية لواشنطن , والا شرايك ؟
أنا : تنفع ليه ماتنفع !
ميم : حبيب ألبي والله يامنص . حتسي !
(4)
ميم : منصور تعرف ديفيد وايز ؟
ح : أنا أعرف ديفيد سوازو
ميم : أقول أنت خلك بالكورة بس . تعرفه منصور ؟
أنا : اي حاخام يهودي , داعية سلام .
ميم : صح , شرايك فيه ؟
ح : أكيد بيعرف عشان دارس سياسة .
ميم : أقول أنت خلك بسوازو حقك وخل البولتيشن للكبار , لما تكبر ويصير عندك ثقافة سياسية تعال سولف معانا أوكي ياحلو ؟ Daaamn
( ح أحد أقربائنا , يعامله ميم كأنه أصغر أولاده على الرغم من أنه أكبر منا جميعاً , الحقيقة أنه يعامل الجميع كأنهم أولاد صغار لاتقتصر المسألة على ح , ربما يستثنيني أنا فقط من هذه المعاملة )
مساء الخير = )
ما ادري ليش احس السيد ميم انسان بقلب ابيض صافي.
كذا من التقاطاته من تحليلاته ،
توثيقك لاحاديثكم سيكون جيّد في حالة فكر السيد ميم كتابة سيرة ذاتيه مستقبلاً .
* من جهة اخرى : دائما اذا جيت احط تعليق بمدونتك تكون الكلمة الي اكتبها في المربع للتحقق من عدم وجود السبام هي : ikea !
ومعرفش ليه، لكنني احب ايكيا.
وأنا أثق ثقة تامة بأن بالك طووويل D:
يسعد صباحك منصور ..
Farfalla
صباح الخير : )
صح , قلب أبيض جميل , أوقات لا أفهم سرّ المحبة الخالصة التي يكنّها لي , ربما لأني أبادله المحبة الخالصة أيضاً ..
هو أكبر مني بشهرين تقريباً , لكن أشعر كأني أمه , أحن عليه : )
اممم إن شاء الله أنا أكتب سيرته الذاتية , لو صار سيناتور بس , غير كذا لا P:
والله ما أعرف , هم الكلمات اللي عندي محدودة 4 كلمات أعتقد . بس شعور جميل إن في بمدونتي شيء يحب حضورك : )
أهلين فيك .
..
أمل
ظنك كذا ؟ هههه
لا والله أنا سعيد كمان فيه , أفرح لما أكون معاه : )
ويسعد أيامك يارب (F)