" جرحٍ ينام ..
وجرحٍ شعر بي وانتبه
قام وتبعني لشرفةٍ ظلما بعيد
جاني يقاسمني السهاد .. جاني قصيد
أدفن يدي تحت الثرى .. فوق الثرى
وأعيش أنا بباقي يدي
نصفٍ يموت .. ونصفٍ درى إنه يموت
يا سيدي .. ربي أنا نقطه فـ بحر
علمني كيف أهوى الحياه
علمني كيف أهوى القدر
علمني بإيماني أكون
يارب .. أكثر من بشر "
أوراق الزمن
" طريقنا واحد ..
امشيه .. معي ..
أحباب .. كانك تبين ..
أصحاب .. اللي تبين ..
يكفي متى ما توصلين
تتذكرين ..
إنك حزينه .. وانا حزين
كافي كلام ..
مابي .. وعد ..
أو التزام ..
طريقنا يمحي الظلام
نمشي مسافات الرجوع
ودرب الهوى كله خضوع
ارمي الجرايد والهموم
لا تجبري عيونك تنوم
لا واسمعي همس النجوم
وهم الوداع .. وكثر الحنين
وكافي كلام .. مابي وعد
أو .. التزام "
طريقنا واحد
" ناديتِ خانتني السنين اللي مضت .. راحت
وناديت .. ماكنّ السنين اللي مضت راحت !
كنّا افترقنا البارحة
البارحة صارت عمر !
ليله أبد عيت تمرّ .. "
صوتك يناديني
" العشق .. هو خال .. وزمام ..
والا العيون اللي .. محاجرها ظلام ..
وقبل السلام .. وبعد السلام ..
يابنت أنا أحبك .. والسلام ..
واناظرك وانتي بشعرك تلعبي ..
باصابعك كل الحديث اللي أبي
ما تعبت ليلي أناظرك .. وما أظنك إنتي بتتعبي
با بنت أنا أحبك .. والسلام .. "
العشق
" يا أول الحب .. شفتك أنا مرة
ويا أعذب الحب .. عشتك أنا مرة
وأهديت لك قلب ..
ورديت لي جمرة !
ومن يومها كان الرحيل ..
وليل الشتا القاسي الطويل
وآه يا الحنين ..
لـ الليل باب له حارسين
برد وسحاب ! "
جمرة غضى
" من رماد المصابيح ..
اللي انطفت فـ الريح ..
جيتك أنا وقلبي
ومن سهاد المواويل
وباقي قصيد الليل
جيتك قمر دربي ..
فيني تعب ؟ لاوالله أكثر !
حالي صعب ؟ لاوالله أكثر !
وكنتي الحبيبة والصديق ..
واللي خذتني من الطريق
وسكنتني أهدابها !
في قلبي شوك
وفـ عيوني شوك !
شوفي أصابعك نزفت ..
من كثر مالمست جروحي
وجففت دمعي الحزين
في صوتي ليل
وفـ صمتي ليل
وإنتي الليالي اللي احلفت
تشعل نجومي في الظلام اللي انطفت
من هالسنين ..
فيني تعب ؟ لاوالله أكثر !
حالي صعب ؟ لاوالله أكثر !
وإنتي الحبيبة والصديق
واللي خذتني من الطريق ..
وسكنتني أهدابها ! "
رماد
الحقيقة .. أنا أوجعت
أكثر من ما توجعت ..
وجرحت
أكثر من ما أنجرحت ..
واعتذاري أكثر من لومي
لكن هذا ما حرمني نومي
ولا أثقل ضميري !
والسبب إني ما كنت البادي ..
في عمري
والأكيد من كسر ظفري ..
كسرت اصبعه !
هذي الحقيقة المفجعة ..
للأسف ..
ما كان عندي الجزاء من نوع العمل
ولكن الذي حصل .
أما عن الناحية المشرقة من القمر
أنا أحتفظ بالجيد من الذكريات
والصور ..
وكل مؤلم يبهت في ذاكرتي وينمحي .
تدري ..
الانسان اذا كان ما يستحي
إنه يقول أخطيت ..
دايم ذكرياته جيدة !
الحقيقة المفجعة
تمرّ.. ساعه الا ربع..
وتو السحاب .. ما يدري وش يبي !
أخاف أسأل صاحبي ..
ويقول .. خلّنا نسري..
وين نسري.. بدري !
بدري على المسرى ورا السحاب قمرا ..
وقمرا ورا الأبواب..
تبي المطر يرقا .. وتهطل نجوم ..
وتظهر علي ..أنا لو علي ..
تحت المصابيح الزرقا ..
قلبي بيحوم .. مثل الفراش ..
تحت الرشاش .. والا الصحو ..
لين أشوفك .. مقبله ..
والله ضلوعي مبلله .. بالشوق ..
وما ودي احاكي صاحبي .. والا أساله ..
بيقول .. خلنا نسري..
وين نسري بدري !
ساعه وربع.. وحنا واقفين تحت المظله..
إما أنهمر فرقا .. والا تقطع وصل ..
يا ماطر الليل ..
لا تاقف .. بوسط السماء !
وأنا لي سنين واحل ..
حملت الطين كله .. لكل الطين !
تخيل يا أنا المسكين .. كم لك
على هذا الأنا .. مصلوب !
دروب الارض .. لكن ..
ما للأرض لو تبغى الهروب .. دروب !
لكن
أظنني قادر على الوقوف ..
وقادر على الترحال ..
بس اصبري ..
لا تسافري .. الين أقوم ..
بالله لا تستعجلي ..
لا تزعلي مني ..
أوراقي وثيابي .. خذيها معك ..
بس افتحي بابي .. وخليه ..
في يوم بيجيني السفر ..
ويدخل علي .. و اهج مثل الناس ..
قول وش أسوي .. ملعون هالإحساس ..
بيجيني السفر